Bujar Nishani, anëtar i Komisionit të Rithemelimit në PD, ka deklaruar se grupimi Berisha, do të hyjë në zgjedhjet e pjesshme lokale.
Nishani tha se në zgjedhje do të hyjnë si koalicion, duke lënë të kuptohet se do të kemi kandidatë të përbashkët edhe me forca të tjera politike, përfshirë LSI-në.
Nishani tha gjithashtu se kandidatët kanë të drejtën e vëzhguesve në Komisione, ndaj ata do të mund të ruajnë votat.
Pjesë nga biseda:
Bujar Nishani: Është proces. Ka patur dy momente. Momenti i parë, që duhet të kthjellonim strukturat tona. Ne mendojmë se e kemi realizuar në 90%. Tani kemi filluar edhe atë organizativ. Biem dakord që është një krizë. Politikisht njerëzit u qartësuan në masë të madhe. Mbetet procesi i formalizimit. Momenti i dytë ka të bëjë me faktin se ne duhet të konfirmohemi si mazhorancë te opinioni publik.
Ylli Rakipi: Grupi Berisha si do të marrë pjesë në zgjedhje?
Bujar Nishani: PD do të marrë pjesë në zgjedhje, se është një mënyrë për tu konfirmuar dhe përballur. E para, për të fituar betejën politike me kundërshtarin tonë natyral, Edi Rama. E dyta, për të zhbërë, jo një pikëpyetje apo paqartësi në opinionin publik, por të zhbërë një platformë spekulimi, që tenton të vërë përballë PD-së, një fasadë që mban selinë. Të dyja janë momente të rëndësishme.
Ylli Rakipi: Si do të hyni ju në zgjedhje?
Bujar Nishani: Ne do të hyjmë në zgjedhje në formën e një koalicioni opozitar, me shumë aktorë të establishmentit politik dhe jo establishmentit politik.
Ylli Rakipi: Me LSI-në?
Bujar Nishani: Nuk kemi një konfirmim, sepse ka vetëm 4-5 ditë që u nis procesi i njoftimit të zgjedhjeve. Komisioni ka nisur menjëherë kontaktet. Pra, për të krijuar një front opozitar të gjerë, një gjë është e sigurtë, që është pothuajse e formalizuar, çështja e realizimit të primareve.
Arjan Curri: A do të keni ju komisionerë? Sepse do t’ju vjedhin votat.
Bujar Nishani: Patjetër. Këto janë zgjedhjet të parakohshme, të pjesshme, vetëm për kandidatin. Kandidati ka komisioner të vetin. Çdo subjekt politik brenda saj, ka të drejtën e vëzhguesit.
