Lulzim Basha u shpreh se me 8 janar u shkel vija e kuqe, pasi u përdor dhunë ndaj selisë së Partisë Demokratike. Basha tha se ata që nuk distancohen nga dhuna do e kenë të mbyllur derën e PD dhe ne u themi ose “ndal” ose dilni jashtë.
“Kush do të distancohet nga dhuna, bujrum le të vijë dhe do të dëgjohet. Le të drejtojë gishtin e akuzës, le të flasë dhe debatojë pa e ndërprerë askush, por jo me dhunë. Ne nuk jemi të hapur as me fasadë as me buzëkuq, por betejën e kemi me regjimin, dhe regjimin e përmbysim vetëm me një aleancë të vërtetë mes PD dhe çdo aktori dhe faktori politik”, tha Basha.
Ai tha se shumica e shqiptarëve e përbuzin dhunën, gjuhën e urrejtjes, ndaj dhe ata njerëz duhet ta kuptojnë se ka vetëm një shtëpi që i bashkon, Partia Demokratike.
Duke e cilësuar 8 janarin si një ditë dramatike, Basha tha se vija ndarëse mes një shumice absolute dhe një pakice që sot bën dhunën, që kanë përfituar në kurriz të kësaj shumice që jemi ne, është pikërisht dhuna.
“Ata që bëjnë dhunën janë aleatët e Edi Ramës”, tha Basha, duke akuzuar drejtëpërdrejtë Sali Berishën si aleatin e Edi Ramës.
