Prokuroria e Tiranës ka mbyllur hetimet për vrasjen e Englantina Bucit dhe ka dërguar dosjen në gjykatë.
Në konkluzionet përfundimtare, organi i akuzës akuzon Faik dhe Shkëlzen Bucin për vrasjen e Englantinës në vitin 2012.
Prokuroria ka kërkuar dënimin me nga 25 vite burg për babë e bir.
Nga hetimet, planin për vrasjen e të resë e ka thurur babai i saj, Faik Buci. Më pas Shkëlzeni, njëherazi dhe vëllai i të ndjerës e ka marrë në makinë pranë zonës së Freskut dhe janë drejtuar në Malin e Dajtit.
Pak metra para se të ndodhte vrasja, 23-vjeçarja i ka kërkuar ndihmë bashkëpunëtorit të drejtësisë, që ta shpëtonte nga i vëllai, por Shkëlzen Buci e qëlloi me një plumb në kokë. Pas vrasjes, bashkëpunëtori i drejtësisë, është kërcënuar me jetë nga Shkëlzen Buci, që të mos tregonte atë që kishte parë.
Dyshohet se Englantina u vra pasi ajo ishte lidhur me një djalë dhe babë e bir nuk ishin dakord.
