Prokuroria e Elbasanit ka thelluar hetimet lidhur me ngjarjen e rëndë të ndodhur një ditë më parë, ku një fëmijë 3 vjeçar, humbi jetën, ndërsa u transportua nga prindërit në spitalin rajonal, pavioni i pediatrisë.
Nga raportimet mësohet se grupi hetimor ka marrë në pyetje për disa orë dy mjekë, ndërsa hetimet janë shtrirë në regjistrat mjekësorë nga dita e parë e vizitës që i është bërë fëmijës deri në ngjarjen e djeshme.
Fëmija që humbi jetën A.I, 3 vjeçe, ishte nga fshati Kusarthi i Elbasanit dhe ajo sipas dëshmive të prindërve ishte me virozë.
Grupi hetimor po kontrollon lidhur me zbatimin e protokollit mjekësor pas paraqitjes së 3-vjeçares në gjendje të rëndë në urgjencën e Pediatrisë së Spitalit të Elbasanit.
Ndërkohë priten përfundimet e ekspertizës mjeko-ligjore për përcaktimin e shkakut të humbjes së jetës së 3-vjeçares që paraprakisht, sipas mjekëve, humbi jetën, pasi ishte prekur nga pneumonia bilaterale me insufiçence respiratore akute dhe insufiçence kardiake.
