Deputeti demokrat Bledion Nallbati u shpreh sot në Komisionin e Ligjeve se policia ka dhunuar fëmijët dhe të moshuarit në lagjen 5 maji, atje ku u shembën 3 banesa, ndërsa denoncoi edhe një skandal, ku banorëve u është kërkuar që të firmosin kontratën e dhurimit të pronës së tyre pa ditur se ku do të banojne më pas.
Ai theksoi se banorët nuk janë kundër projekteve zhvillimore, por kundër paligjshmërisë dhe indiferencës së Bashkise Tiranë dhe Kryeministrisë.
“Ne nuk mund ta lëmë tani atë proces kur atje matrapiku kërcet dhe shtëpitë po shemben dhe të merremi me këto punë. Sigurisht që këto janë çështje të rëndësishme, por këto preson. Atje shtëpitë shemben, banorët po dalin jashtë. Ndaj iu lutem të gjithëve si qytetarë,, jo si deputet, si qytetarë, si prind, si fëmijë i atyre prindërve, të bëhemi bashkë dhe t’i japim zgjidhje këtij problemi”, tha Nallbati.
Ai tha se ka parë fëmijë në moshën e fëmijëve të tij, prindër në moshën e prindërve të tij, gjyshër në moshën e gjyshërve të tij, të cilët shtyheshin, dhunoheshin, zhgarraviteshin nga forcat e policisë atje.
“Dhe çfarë kërkonin ata njerëz? Ata njerëz ishin dakord që ajo pronë të zhvillohej por kërkonin që institucionet përgjegjëse të ishin atje me ta, të bënin një marrëveshje konform rregullave dhe ligjeve. Ata zotërinjtë atje të blinin, që po largoheshin nga shtëpitë e tyre por ku do të shkonin sepse atyre u është kërkuar që të firmosin kontratën e dhurimit të pronë së tyre ndaj bashkisë kundrejt një kontrate premtimi evazive që nuk përcakton vendin se ku do ta kenë shtëpinë, sipërfaqen, kohën se kur do ta marrin se ju thuhej dilni sot nga shtëpia dhe do të vini kismet zotit kur ne do ta gjejmë një mundësi për t’ju strehuar.
Dhe se ku do të rrinë këta njerëz, këta fëmijë, këta pleq, këta burra e gra nuk kishte as edhe një informacion. Dhe ajo që ishte më e keqja ishte që ata njerëz u ishin drejtuar zyrtarisht të gjitha institucioneve të shtetit dhe sot e kësaj dite nuk kishin marrë as edhe një përgjigje. As nga kryetari i bashkisë, as nga kryeministri, as nga ministria, as nga Drejtori i Përgjithshëm i Policisë”, tha Nallbati.
