E ndërsa nuk kursyen elozhet për njëri tjetrin duke u cilësuar si miq të veçantë apo specialë, Kryeministri Edi Rama dhe Presidenti turk, Rexhep Tajip Erdogan, kanë qenë në pothuajse të njëjtën gjatësi vale pvrsa i takon kritikave në drejtim të liderëve të BE-së.
Në ceremoninë e zhvilluar në Laç, ku Erdogan u prit si Sulltan, duke i bërë nderime që askujt nuk i ishin bërë më parë, Edi Rama u shpreh se për shkak të funksionit të tij si Kryeministër ka takuar shumë liderë botërorë, por i vetmi që thotë PO dhe e bën, ose bën atë që ka thënë PO, është Presidenti, miku im i ngushtë Erdogan.
Qëndrimet e Ramës në raport me BE janë të ditura dhe ai shpeshherë nuk ka nguruar që të shprehë kritika, jo vetëm për atë që e konsideron si zvarritje për hapjen e negociatave, por edhe gjatë kohës së pandemisë kur BE mbylli kufinjtë.
Dhe këtë moment e ka risjellë në vëmendje edhe Presidenti Erdogan, i cili në fjalimin e tij, u shpreh se “gjatë pandemisë të gjithë shtetet e mëdha u kyçën dhe mbyllën edhe sytë e tyre, ama ne bëmë të kundërtën, dolëm edhe jashtë kufijve për të parë dramat e vëllezërve tanë për t’u qëndruar pranë me çdo mundësi”.
