Presidenti turk Rexhep Tajip Erdogan ka marrë fjalën në ceremoninë e organizuar në Laç, nga ku u shpreh se gëzimi i Shqipërisë është gëzimi ynë, sikundër hidhërimi juaj, është edhe i joni.
“Mirëqënien dhe paqen tuaj e konsiderojmë si tonën. Duke qenë si një popull i një vendi që ka përjetuar situata të ngjashme, tërmetet e 21 shtatorit dhe ai i 26 nëntorit, lënduan zemrat tona, njëlloj sikundër zemrat e popullit shqiptar”, tha Erdogan, duke shtuar se “jemi munduar të shërojmë plagët e njerëzve të prekur”.
“Mobilizuam të gjitha mundësitë tona, vëllai i qëndron pranë vëllait kur ka nevojë dhe jo kur thirret”, tha Erdogan, duke i qëndruar linjës së shprehur mmë parë nga Kryeministri Edi Rama apo Kryeparlamentarja Lindita Nikolli.
Gjatë fjalës së tij, Erdogan nuk nguroi ta cilësonte Ramën një mik të ngushtë, ashtu sikundër më parë Kreu i Qeverisë shqiptare, cilësoi Presidentin turk.
Erdogan tha se për të lehtësuar sado pak dhimbjet e familjeve të prekura nga tërmeti ne morëm vendimin bashkë me Kryeministrin Rama për të rindërtuar të gjitha banesat e dëmtuara nga tërmeti.
“Në muajin korrik 2020, sapo nënshkruan memorandumin e mirëkuptimit, nisëm ndërtimin e kantierit, megjithëse kishte shpërthyer koronavirusi.
Para 13 muajsh, pikërisht në këtë vend bëmë ceremoninë e nisjes së punimeve dhe sot po dorëzojmë 522 banesat që kanë kushtuar 42 mln euro”, tha Erdogan.
Në vijim ai theksoi “shenja e vëllazërisë nuk është kur të thërrasin, por të qëndrosh pranë vëllait tënd kur ka nevojë dhe ne do ju qëndrojmë pranë. Shpresoj që kjo miqësi me baza kaq të forta do të vazhdojë deri në pafundësi. Shqipëria dhe Turqia ndajnë sëbashku vlera historike”.
“Gjatë pandemisë ne nuk u kyçëm sikundër bënë shtetet e mëdha, që mbyllën edhe kufinjtë. Ne ndihmuam miqtë tanë në luftën ndaj pandemisë dhe ndamë me ta mundësitë që kishim dhe si produkt dhe frymë i këtij solidariteti ne kemi spitalin Rajonal të Fierit, i cili u ndërtua brenda 68 ditëve”, tha ai.
Erdogan bëri një përshëndetje për Edi Ramën, që e konsideroi një mik special.
