Lulzim Basha, i shkarkuar si kryetar i PD nga Kuvendi Kombëtar i 11 dhjetorit, por edhe nga referendumi i anëtarësisë më 18 dhjetor, zhvilloi sot një takim në Fier, ku u prit me protesta nga demokratët.
Gjithsesi në një sallë të mbushur në Teatrin Bylis, jo me entuziazmin që karakterizon takimet partiake, Basha i cilësoi kryeministrin Rama, Presidentin Meta dhe ish-kryeministrin Berisha, tre dinozaurët e tranzicionit.
Ai u shpreh se me vettigun e politikanëve do t’i jepet fund dominimit të tyre të cilët sipas tij kanë arsyet e tyre që nuk e duan vettingun në politikë.
“Të hapim një faqe që duhet të ishte hapur dekada më parë,jo thjesht pluralizëm formal por atë të pluralizmit të vërtetë, ku Shqipëria dhe politika e shqiptarëve nuk i takojnë më 3 dinozaurëve të tranzicionit por 3 milion e kusur shqiptarëve. Dhe për këtë duhet të bëjmë sa më parë vettingun e politikanëve.
Ndarja me regjimin e Edi Ramës kërkon që ne të parët të kërkojmë atë ligj që në mënyrë të detyrusheshme njësoj si për noterët, politikanët të kalojnë në vetting. Secili prej brinjëve të trëkëndëshit të Bermudës ka arsyet e veta se pse nuk e do vettingun. Kjo do ta ndajë thashethemin nga e vërteta”, tha Basha.
