Sali Berisha, ish-Kryeministër, gjatë një takimi me demokratët e Shkodrës, u shpreh se 8 janari ishte fillimi i protestave, pasi ato nuk do të ndalen.
Berisha duke i dhënë fjalën shkodranëve tha se protestat dhe revolucioni nuk do të ndalen deri në fitoren e kauzës sonë.
“Në çdo vend demokrat, Policia e Shtetit do të nxirrte nga zyra banditët dhe mercenarët që ndodheshin aty dhe sulmuan demokratët. Por Policia e Edi Ramës vendosi të sulmojë demokratët, në protestën e tyre më paqësore”, tha Berisha.
Ai u shpreh se nga ky revolucion shqiptarët e lirë dhe të ndershëm po kërkojnë që të respektohet vota dhe liria e tyre
“U them atyre që mbështesin Edi Ramën dhe Lulzim Bravën, se do të dështojnë në përpjekjen e tyre për të marrë peng pluralizmin”, tha Berisha.
Ish-Kryeministri akuzoi Edi Ramën se po përfiton miliardat nga trafiku i drogës që vjen me kontenier në Shqipëri.
“Sot kemi një narko-Kryeministër që qeveris me bandat, që vendos mbi ne sistemin e patronazhistëve, që grabit votat, që po vret shpresën e qytetarëve që ata të largohen, në mënyrë që të mos mbushen rrugët dhe sheshet kundër tij. Sot kemi një narko-kryeministër që shkelmon interesin kombëtar, që vendoset në aleancë me Beogradin kundër kombit shqiptar”, tha Berisha.
Ish-Kryeministri tha se Edi Rama në mënyrë të tmerrshme transplatoi modelin e tij edhe në krahun e tij.
“Cili është votimi në partinë e Lul Bravës? Vota e 1800 qytetarëve në anti-Kuvendin e tyre shpallet si vota e 5004 e delegatëve. A ka përdhosje më të madhe se kjo për votën e lirë? Të paktën Rama deklaron se nuk ka lidhje me votën, kurse Lul Brava në mënyrën më të shëmtuar mashtron. Beteja jonë është pvr votën e lirë”, tha Berisha.
