Ish-Kryeministri Sali Berisha dhe Lulzim Basha, i shkarkuar nga posti i kreut të PD me vendimin e Kuvendit Kombëtar të 11 dhjetorit dhe më pas me referendumin e anëtarësisë më 18 dhjetor, kanë njoftuar sot takime me anëtarët e kësaj partie.
Berisha pritet që në mesditë të zhvillojë takimin me anëtarësinë në Pallatin e Sportit të Shkodrës, ndërsa Basha do të tentojë të mbledhë demokratët e Fierit, në sallën e Teatrit Bylis.
Berisha kërkoi pak ditë më parë që të gjithë demokratët e Shkodrës të ishin të pranishëm në Pallatin e Sportit për të përkujtuar 31 vjetorin e krijimit të PD në këtë qark, por edhe për të nisur turin e takimeve nëpër rrethe të ndryshme ku do të kërkojë mbështetjen e plotë të anëtarësisë.
Nga ana tjetër Basha ka organizuar një takim ditën e sotme në Fieri, me qëllim që të fillojë edhe ai turin e takimeve. Nga raportimet e djeshme u mësua se një shumicë dërrmuese e demokratëve të Fierit kanë refuzuar pjesëmarrjen në takimin e Bashës, ndërsa ka dyshime se salla e Teatrit Bylis mund të mbushet me ndihmën e të paktën dy kryebashkiakëve socialistë, Armando Subashit dhe Majlinda Bufit. Këta të fundit sipas raportimeve janë angazhuar për të siguruar pjesëmarrjen, jo përmes të punësuarve në Bashki, të cilët mund të identifikohen lehtësisht, por të afërmve të tyre.
