Ndeshja e fundit e javës së 16-të të Abissnet Superiore që ishte parashikuar të luhet ditën e mërkurë në stadiumin “Kukës Arena” është zhvendosur të luhet në “Elbasan Arena”.
Siç duket akoma stadiumi i skuadrës së Kukësit nuk është gati për të pritur një ndeshje të kampionatit shqiptarë, edhe pse dëshira e drejtuesve dhe tifozëve kuksianë ishte shumë e madhe që skuadra të rikthehet të luajë në shtëpinë e saj pas afro 3 vitesh.
“Shtegtimi” i skuadrës së Diego Longos do të vazhdojë dhe FSHF-ja ka treguar edhe arsyen se pse ndeshja mes verilindorëve dhe bluve të kryeqytetit u zhvendos në “Elbasan Arena”.
“Kukësi vazhdon të luajë si udhëtues duke mos pasur ende mundësi për të luajtur në stadiumin e ri që është ndërtuar. Fusha e “Kukësi Arena” është inspektuar nga Kostas Poulios, eksperti i firmës së specializuar për fushat “Hellasod”. Pas inspektimit të zhvilluar ditën e premte, është marrë vendimi se fusha nuk është ende gati dhe nuk do të rrezikohet në përdorimin e saj për shkak të motit të ftohtë dhe ngricave që kanë pamundësuar lëshimin e rrënjëve të tapetit”, thuhet në njofitmin e FSHF-së.
