Ish-Kryeministri Sali Berisha u shpreh gjatë një interviste për RTK se Lulzim Basha mbahet në selinë e demokratëve nga Edi Rama dhe policia e tij.
Berisha tha se protesta e 8 janarit ishte paqësore, ndërsa protestuesit paqësorë u sulmuan me gaz dhe lëndë kimike.
“Policia së pari, po të jetë shtet ligjor, duhej të arrestonte banditët që ndodheshin në selinë e PD. E dini ju që Sokol Bizhga ka urdhëruar dhunën ndaj protestuesve paqësorë, ndërsa një oficer i tij, i ka thënë po pse ti sulmojmë ata nuk po bëjnë asgjë?
Po të kishim shtet ligjor, Policia duhej të parandalonte atë që ndodhi, pasi kemi sot qindra shqiptarë të intoksikuar thellë nga helmet që u hodhën mbi ta”, tha Berisha.
Kush ka legjitimitetin e PD-së sot?
Berisha: E ka vetëm Komisioni i Rithemelimit të PD-së. Ky është legjitimiteti i sotëm i PD-së.
Po grupin parlamentar të PD-së?
Berisha: Grupi parlamentar ka diskutimet e veta. Në çdo forcë politike të botës, kur të vijë puna në zgjedhjet në parti, nga kryetari i partisë te deputeti dhe te cilido tjetër janë vetëm një votë. Ky është proces partiak në të cilin janë bashkuar një pjesë e deputetëve, të tjerë kanë qëndruar neutral, të tjerë kanë qëndruar në favor të pengut Basha.
