Një tjetër protestues është ndaluar nga policia e Tiranës lidhur me protestën e zhvilluar në Partinë Demokratike më 8 Janar.
“Specialistët për Hetimin e Krimeve në Komisariatin e Policisë Nr. 1, nën drejtimin e Prokurorisë së Rrethit Gjyqësor Tiranë, në vijim të veprimeve hetimore të kryera në lidhje me shkatërrimin e pronës dhe aktet e dhunës, gjatë protestës së zhvilluar në datën 8 janar 2022, në selinë e Partisë Demokratike, bazuar në provat e grumbulluara, bënë ndalimin e shtetasit L.S., 54 vjeç”, njoftoi policia.
“Ndalimi i tij u bë për veprat penale ‘Organizimi dhe pjesëmarrja në grumbullime e manifestime të paligjshme’, ‘Prishja e qetësisë publike’, ‘Pengimi i qarkullimit të mjeteve të transportit’, ‘Shkatërrimi i pronës’ dhe ‘Prodhimi, mbajtja, blerja apo shitja pa leje e armëve të ftohta’. Ky shtetas dyshohet se gjatë protestës ka thyer dyer e dritare të selisë së Partisë Demokratike, duke përdorur mjete të forta”, shtuan të njëjtat burime.
Ndërkohë, 34 prej të arrestuarve më herët do të njihen këtë të Mërkurë me masën e sigurisë. Prokuroria ka kërkuar masat detyrim paraqitja dhe arrest shtëpie për të ndaluarit.
