Gjykata Administrative ka rrëzuar kërkesën e Shkëlqim Selamit, ish-deputetit të LSI-së, për të pezulluar heqjen e mandatit të tij si deputet nga KQZ-ja.
Selami kërkoi pezullimin e heqjes së mandatit derisa të shqyrtohet çështja. Por sot Gjykata Administrative e ka rrezuar kërkesën e tij për pezullim. Gjykata ka vendosur shqyrtimin e kërkesës në themel më 6 shkurt.
Ish-deputeti Selami nuk ishte i pranishëm në seancë.
Selami ka kërkuar në padi shfuqizimin e aktit administrativ të datës 29 dhjetor të shpallur nga KQZ, që ndërpreu mandatin e tij. Kërkesa e dytë e ish-deputetit ndaj Gjykatës Administrative është që trupa gjyqësore të marrë masën e sigurimit të padisë duke pezulluar vendimin e KQZ deri në përfundim të gjykimit në themel.
Në padi avokati i Selamit, Genc Çifliku, arsyeton se Prokuroria e Përgjithshme, ka vepruar në kundërshtim të hapur me parashikimet ligjore, në kryerjen e procesit të verifikimit për masat e sigurimit personal. Sipas tij, verifikimi duhej të kryhej mbi bazën e vendimeve të dhëna nga gjykatat e huaja dhe jo mbi bazën e të dhënave policore.
Mandati i Selamit u hoq nga KQZ-ja më 29 dhjetor, pasi nga të dhënat e prokurorisë rezultoi se ai kishte fshehur të dhënat e tij personale në formularin e dekriminalizimit.
Pak ditë më parë e njëjta gjykatë rrëzoi të njëjtën kërkesë edhe për ish-deputetin demokrat Dashamir Tahiri.
