Kryeministri Edi Rama ka reaguar sot lidhur me situatën me të cilën u përball Policia në selinë e PD duke thënë se kjo lloj ndërhyrje ishte ndër më të vështira sepse ishin grupime brenda partiake që sulmonin njëri-tjetrin.
Ndërsa lidhur me pretendimin e Lulzim Bashës i cili tha se policia ishte vonuar për të ndërhyrë, Rama u përgjigj me ironi duke thënë se kreu i PD kishte bërë diçka që nuk mund ta bënte kurrë dikush.
Rama tha se Basha në vend që të kërkonte që në fillim ndihmën e policisë, kishte bërë fortifikime brenda selisë së PD.
“Situata është shumë e vështirë për momentin, unë uroj që dhuna që pamë dhe fortifikimet, janë e njëjta anë e medaljes për të thënë të vërtetën, Policia e shtetit ishte në sfidën më të vështirë në këto 30 vite sipas meje.
Kurrë më parë policia nuk e ka pasur sfidën e saj që të futet në oborrin e partive, që të ndajë palët e njëjta, çështja është trajtuar me profesionalizëm. Për mua dhuna mund të ishte shmangur, nëse nuk do të ishte fortifikuar selia”, tha Rama.
Sipas tij, Lulzim Basha bëri atë që nuk mund ta bëjë kurrë dikush që ka sensin e përgjegjësisë ndaj njerëzve duke folur për fortifikime në vend se të fliste për nevojën që ai institucion të mrbohej nga policia e shtetit.
