Pas protestës së zhvilluar dhe në selinë e Partisë Demokratike, e cila u shpërnda në mënyrë të dhunshme nga Policia, pas kërkesës së Lulzim Bashës, nisën arrestimet e protestuesve dhe procedimet penale.
Nga informacionet e fundit raportohet se mes personave të proceduar janë edhe Gazment Bardhi dhe Flamur Noka, të dy deputetë, por të pozicionuar në kahe të kundërta në përplasjet në Partinë Demokratike.
“Në vijim të veprimeve u proceduan penalisht shtetasit:
G. B., për veprat penale “Shkelja e rregullave mbi lëndët plasëse dhe djegëse dhe radioaktive” dhe “Stërvitja për prodhimin dhe përdorimin e paligjshëm të armëve e lëndëve të tjera të rrezikshme”;
F. N., për veprat penale “Organizimi dhe pjesëmarrja në grumbullime e manifestime të paligjshme” dhe “Pengimi i qarkullimit të mjeteve të transportit””, thuhet në një njoftim zyrtar.
Bardhi, i cili vijon të mbajë postin e Sekretarit të Përgjithshëm të PD, edhe pse i shkarkuar nga funksionet nga Kuvendi i 11 dhjetorit 2021, u shfaq dje pas protestës shumë aktiv, ndërsa akuzoi për dhunë mbështetësit e ish-Kryeministrit Sali Berisha, dhe këtë të fundit si shkaktarin e dhunës në selinë e PD.
