Pak orë para nisjes së protestës së thirrur nga Komisioni i Rithemelimit, Lulzim Basha ka mbledhur në seli deputetë dhe mbështetës të tij, pjesë të strukturave, që janë pozicionuar prej 9 shtatorit në krah të tij.
Nga pamjet e transmetuara vihet re se disa prej deputetëve janë shfaqur me shoqërues, madje në një numër të shtuar, krahasuar me ditë më parë. Kështu Enkelejd Alibeaj, i cili mban edhe postin e nënkryetarit të Kuvendit, u shfaq i rrethuar nga 4 truproja, që nuk dihet nëse janë private apo të Gardës së Republikës.
Një ditë më parë, Spartak Braho, nga një studio televizive hodhi tezën se në përplasjen e sotme në selinë e PD mund të ketë viktima, duke përmendur inicialet e një deputeti, E.A, që përkojnë me ato të Enkelejd Alibeaj. Nuk dihet nëse Alibeaj ka shtuar masat pikërisht nga deklaratat e Brahos, apo jo.
Ndërkohë, deputetja Grida Duma, në momentin e mbërritjes së saj, u shpreh se asgjë nuk do ndodhte dhe se pas përfundimit të mbledhjes çdo gjë do vazhdonte normalisht.
“Të kryejmë mbledhjen dhe pastaj gjithsecili vazhdon punën në mënyrë normale”, tha Duma.
Sa herë që mbështetës të ish-Kryeministrit Sali Berisha dhe Komisionit të Rithemelimit janë shfaqur në selinë e PD, Lulzim Basha ka mbledhur anëtarë të strukturave apo deputetë, pikërisht në oraret e njoftuara nga ata që i konsideron si kundërshtarë.
Edhe sot kur është njoftuar një protestë paqësore para selisë së PD, me qëllim zbatimin e vendimeve të Kuvendit të 11 dhjetorit, një prej të cilave është edhe lirimi i zyrës nga Lulzim Basha, ky i fundit ka mbledhur mbështetësit e tij në seli.
