Komisioni i Rithemelimit të PD ka shkuar sot në selinë e kësaj partie, ku sërisht i ka gjetur dyert e mbyllura. Të pranishëm me përfaqësuesit e Komisionit të Rithemelimit ishin edhe anëtarë të strukturave 1, 3 dhe 7 të degëve të Tiranës.
Por dyert e selisë nuk janë hapur, gjë që ka sjellë edhe reagimin e anëtarëve të Komisionit të Rithemelimit, sipas të cilëve Lulzim Basha, si peng i Edi Ramës, i ka mbyllur dyert demokratëve, atyre që mbushën sheshet e protestave dhe i dhanë mandatet e deputetëve, edhe atyre që sot shfaqen si neutral në krah të Lulzim Bashës.
Ish-deputeti Aldo Bumçi tha se kjo është e papranueshme dhe anormale që selia e PD-së është kthyer në një bunker.
“Kjo është opozita që bën Lulzim Basha, e kthen selinë në një bunker. Ne jemi treguar tolerant dhe kemi zgjedhur rrugën institucionale, duke respektuar statutin e partisë. Ditën e shtunë ne do e kthejmë selinë në shtëpinë e demokratëve.
Kjo nuk është më çështje mes Bashës dhe Berishës, por është vullneti i 44 mijë demokratëve, që votuan për shkarkimin e Lulzim Bashës.
Një thirrje kam për ata që sot mbështesin Bashën, por shfaqen si neutralë: nuk mundet më të qëndroni si të tillë, pasi ju nuk mund të nëpërkëmbni më vullnetin e 44 mijë demokratëve”, tha Bumçi.
Ndërkohë ish-deputeti Gent Strazimiri tha se oborri i PD është i zbrasur nga demokratët, ndërsa godina është mbyllur nga Lulzim Basha.
“Me datën 8 janar do të jenë 44 mijë demokratë që do të hyjnë në seli. Kjo është shtëpia e demokratëve, askush nuk mund ti zbrasë oborrin dhe godinën e PD”, tha ai.
