Deputeti i PD, Kreshnik Çollaku, ka reaguar lidhur me zhvillimet e pritshme në Partinë Demokratike, pas afatit që i ka caktuar Komisioni i Rithemelimit, Lulzim Bashës, për tu larguar nga zyra e kreut të PD deri në 5 janar 2022.
Në rast refuzimi, pritet që anëtarësia e PD të zbatojë vendimin e Kuvendit Kombëtar të 11 dhjetorit, i cili u ratifikua nga referendumi i 18 dhjetorit, ku morën pjesë rreth 44 mijë anëtarë.
Çollaku në reagimin e tij për Oranews shprehet se Komisioni i Rithemelimit i ka kujtuar ultimatumet e komiteteve të shpëtimit të ’97.
Çollaku thotë se palët duhet ti thërrasin arsyes.
“Të përpiqemi të qëndrojmë bashkë duke pasur ide të ndryshme por edhe nëse vlerësojmë se nuk mund të rrimë dot bashkë se jemi aq të ndryshëm ka mënyra civile, të qytetëruara që të ndahemi në mënyrë të qytetëruar.Është e trishtueshme, do të desha të ishte një ëndërr e keqe thirrja e disa miqve të mi dhe të tjerëve këtu për të pushtuar, dhunuar demokratët apo selinë e PD. Të gjithë e dinë as në 5, as në 8 as në 18 asgjë nuk ndodh se partia ka institucione.
Të krijohet një provokim i tillë i shëmtuar do të ishte një dhuratë e pamerituar për Edi Ramën, turpërim i PD. Sot që të shmangin këtë turp e kanë në dorë këta miqtë e mi, jo demokratët e mërzitur me Lulzim Bashën, me ne, jo ata që kanë firmosur, jo ata që kanë menduar se po bëjnë referendum, kuvend. Sot këtë përgjegjësi e ka një grup 10-20 vetash që për karrierën e tyre, kënaqësitë dhe pakënaqësitë e tyre dhe Lulzim Bashën, disa e kanë të drejtë mërzinë me Lulzim Bashën por jo për këtë motiv. Ata e kanë në dorë ti thërrasin arsyes dhe ta shpëtojnë të gjithë bashkë këtë seli, këtë sigël, këtë parti nga një turp. Nëse akte të tilla ndodhin do të ishte turpërimi më i madh për këtë parti”, tha deputeti demokrat, i pozicionuar në krah të Lulzim Bashës.
