Në spitalet Covid kanë kaluar natën e ndërrimit të viteve 100 pacientë që po kurohen për koronavirusin, ndërsa 10 prej tyre ndodhen në terapi intensive.
Në një kohë kur disa mijëra qytetarë kanë festuar në sheshe apo rrugë, ku nga kryebashkiakë ka pasur organizime edhe me koncerte, si në rastin e Tiranës, për të pritur Vitin e Ri, situata e pandemisë në vend duket se ka hyrë në një tjetër valë.
Gjatë natës së ndërrimit të viteve dhe në orët në vijim, të paktën 20 pacientë janë shtruar në spitalin Covid në QSUT, mes të cilëve edhe një 27 vjeçare shtatzënë, e cila ndodhet në gjendje të rënduar shëndetësore si pasojë e Covid.
Ajo është në muajin e tetë të shtatzënisë dhe sipas raportimeve mjekët kanë vendosur ndërprerjen e shtatzënisë për t’i shpëtuar jetën.
Nga raportimet mësohet se pacientët që kanë nevojë për trajtim spitalor janë prekur nga varianti Delta, ndërsa bazuar në të dhënat zyrtare, varianti Omicron qarkullon në Shqipëri, por nuk dihet se në ç´masë është. Ndoshta rritja e rasteve të reja, raportuara një ditë më parë, ose ditën e fundit të 2021-it, janë rezultat i këtij varianti, për të cilin dihet se ka një infektueshmëri të lartë, por është më pak i rrezikshëm se ai Delta.
