SPAK ka hedhur poshtë akuzat e Mirel Mërtirit për shpifje ndaj disa prej deputetëve të opozitës, të cilët kishin denoncuar aferën e inceneratorëve.
Deputetja Jorida Tabaku shprehet se pak javë pasi kishte nisur komisioni hetimor për inceneratorët, njeriu që është pronari real i 3 kompanive të inceneratorëve dhe strumbullari që është nyja lidhëse mes kompanive dhe shtetit, Mirel Mërtiri (i njohur edhe si Klodian Mërtiri) dërgoi një padi për shpifje ndaj disa deputetëve të PD.
Sipas tij, akuzat që opozita i ka bërë me fakte dhe prova Mirel Mërtirit ishin sajesat politike. Tabaku shkruan se Gjykata ka rrëzuar akuzat e Mirel Mërtirit ndaj deputetëve të opozitës, të cilët i kishte paditur në SPAK për shpifje.
“Një hap të tillë Mërtiri e ka marrë në fakt edhe ndaj mediave kur ato zbuluan dhe evidentuan lidhjet e tij me ministrat e qeverisë Rama.
Sot, pak ditë pasi Mërtiri dërgoi në SPAK akuzën e tij për shpifje, Mirel Mërtiri është në kërkim ndërkohë që skema e tij dhe bashkëpunëtorëve të tij po zbulohet dita ditës.
Në padinë e tij Mërtiri kishte vendosur një listë të gjatë provash ku përfshihen deklaratat e mia.
Sa më shumë koha kalonte aq më e qartë bëhej afera që mbante erë korrupsion dhe aq më të qarta bëheshin lidhjet okulte të Mërtirit me Arben Ahmetaj (me të cilin ka konsumuar edhe udhëtime), me Damian Gjiknurin, me Edi Ramën, me Ëngjëll Agaçin, me Qazim Sejdinin, me Armando Subashin dhe padyshim me kumbarin e vogël Erion Veliaj.
Kjo është një aferë me një vlerë marramendëse prej 430 mln eurove dhe mjafton t’u them që sipas të dhënave të Ministrisë së Financave inceneratori i Tiranës është ndërtuar në 30% të kapacitetit të programuar megjithse ka marrë 100% të fondeve.
Pikërisht duke pasur parasysh këto prova të qarta akuza e ngritur nga Mirel Mërtiri karshi kryetarit të PD, meje dhe kolegëve të mi u pezullua nga Gjykata.
Afera e inceneratorëve është një aferë korruptive e drejtuar dhe manaxhuar nga një Grup i Strukturuar Kriminal i cili duhet të mbajë përgjegjësi për abuzimin prej mbi 430 mln eurove.
Komisioni Hetimor për Inceneratorët do të vazhdojë punën për t’u dëshmuar shqiptarëve se si ka operuar ky grup i strukturuar kriminal për të abuzuar dhe vjedhur mbi 430 mln euro”, shprehet Tabaku.
