Depozita e vajit e ashensorit, e cila ndodhej pranë kafazit të tij, është bërë shkak i ngjarjes së rëndë të një ditë më parë, ku humbi jetën një 29-vjeçare, e shkrumbuar nga flakët e zjaerrit.
Është ky përfundimi i raportit të hartuar nga ISHTI mbi ngjarjen e rëndë.
“Rreth orës 09.48 ka marrë zjarr depozita e vajit të ashensorit hidraulik e cila ndodhej brenda kafazit të ashensorit. Zjarri i rënë ka dëmtuar kafazin e ashensorit dhe pastaj ka shkaktuar vdekjen e një banoreje të këtij pallati. Kabina ndodhej e pozicionuar në katin e parë dhe kishte dhe ajo në brendësi materiale konstruktive të djegshme”, thuhet në raportin e ISHTI.
ISHTI thotë gjendja nuk do të kishte agravuar në këtë pikë nëse nuk do të shoqërohej nga moseleminimi i rrjedhjeve të vajit, mospastrimi i vajit të rrjedhur dhe papastërtive në fundin e kafazit të ashensorit.
ISHTI thotë se nuk ka pasur ndonjë skemë lajmërimi për dëmtimin e ashensorit sipas kërkesave të standardeve për ashensorët.
Nga kontrolli i rrjetit elektrik është konstatuar se nuk ka pasur rënie automati monofazor që i përkiste familjarëve. Ndërsa automati trefazor i ambienteve të përbashkëta, prej nga furnizohet dhe ashensori me energji ka qënë i stakuar.
Ngjarja e djeshme ndodhi në lagjen “Fresku” në kryeqytet.
Policia sakaq po vijon hetimet për zbardhjen e plotë të ngjarjes.
