Grupi i punës për zgjedhjet në FRPD, i ngritur nga Lulzim Basha, ka publikuar sot kriteret, që sipas tyre duhet të plotësojnë kandidatëtpër postin e kreut të këtij forumi.
E gjithë kjo situatë, e cila po merr nota humori, zhvillohet në një kohë kur ka njv vendim të Kuvendit Kombëtar të PD të 11 dhjetorit që ka shkarkuar Lulzim Bashën si Kryetar të partisë, vendim ky i ratifikuar nga referendumi i anëtarësisë, ku rreth 44 mijë anëtarë, u shprehën pro shkarkimit të Bashës. Në anën tjetër Kryesia e FRPD në qëndrimin e saj, e konsideron si shkelje të statutit, jo vetëm të PD, por edhe të kësaj organizate, të gjithë procesin e nisur nga Basha.
Ndaj këtij të fundit është vendosur edhe një afat, data 5 janar, për lirimin e zyrave të PD, ndërsa ish-Kryeministri Sali Berisha ka paralajmëruar se nëse Basha nuk reflekton atëherë në datën 8 janar, anëtarësia e PD do e nxjerrë nga zyra shumë paqësisht.
Por duket se Basha po çon deri në fund projektin e tij për zgjedhjet në FRPD, edhe pse çdo vendimmarrje e tij konsiderohet nul.
Në një njoftim zyrtar thuhet se “Grupi Qendror i Punës për riorganizimin e Forumi Rinor i Partise Demokratike, me kënaqësi ndanë me të rinjtë dhe të rejat demokratë udhëzimin për nisjen e procesit të zgjedhjeve në të gjitha strukturat drejtuese, lokale dhe qendrore. Zgjedhim Të Ardhmen”.
Ndër kriteret e përzgjedhura nga grupi i Bashës për kandidatët thuhet se ata duhet të jenë nën 30 vjeç, nga gara e kandidimit përjashtohen anëtarët e grupit të punës, kandidatët duhet të kenë mbaruar arsimin e lartë,si dhe duhet të jenë njerëz me integritet.
