Katër rrugë në Tiranë do të mbajnë emrat e policëve që u vranë në aksionin për kapjen e Dritan Dajtit.
Në verën e 2009-s, efektivët e policisë Fatos Xhani, Kastriot Feska, Saimir Duçkollari dhe Altin Dizdari do të humbisnin jetën në krye të detyrës në aksionin për të arrestuar Dritan Dajtin pranë plazhit “Iliria” në Durrës.
Bashkia e Tiranës ka vendosur që t’i nderojë katër “Dëshmorët e atdheut” duke emërtuar katër rrugë të reja në kryeqytet si vlerësim për sakrificën e tyre sublime.
“Nga Drejtori i Policisë së Republikës së Shqipërisë, Gledis Nano, kemi marrë një propozim për të emërtuar në kryeqytet një kryqezim me katër rrugë në emër të katër Dëshmorëve të Policisë të rënë në një aksion.
Ka qenë një aksion për të cilin ende flitet dhe ende ka diskutime. Këta punonjës të policisë ranë në një aksion për të kapur një organizatë kriminale. Është një kryqëzim i ri në Njësinë 1, aty ku është një rreth rrotullimin i madh, ku kemi bërë një investim të ri të zgjerimit të Lanës. Do të jenë këto katër akse që puqen në këtë kryqëzim të ri që do të marrin emrat e këtyre katër dëshmorëve të atdheut”, tha Veliaj.
