Kryeministri Edi Rama ka kërkuar nga Prokuroria që të hetojë deri në fund skandalin e publikimit të të dhënave sensitive dhe pagat.
Rama tha se Prokuroria duhet të hetojë çdo inspektor tatimesh që punon apo ka punuar dhe ka pasur akses në sistemin e pagave.
Kryeministri u shpreh se me shumë gjasa rrjedhja e informacioneve më shumë është një ndërhyrje nga brenda se sa nga jashtë, edhe pse ndërhyrje të tilla nga jashtë kanë ndodhur në shumë prej vendeve të zhvilluara.
Gjithashtu Rama udhëzoi Prokurorinë që të hetojnë edhe ata të “Foltores” dhe kundra-Foltores që paralajmërojnë çudirat e tjera që do të ndodhin.
“Ne jemi të ekspozuar ndaj sulmeve kibernetike dhe AKSHI funksion në 3 shtylla, që përfshihet edhe mbrojtja kibernetike, dhe për javë përballet me sulme kibernetike”, tha Rama.
Ai theksoi se po punohet me Qeverinë amerikane për mbrojtjen kibernetike. “Ndërkohë që përforëcimi i mureve mbrojtëse të sistemeve po vijon, në këtë rast duhet një hetim i thellë, ku të thirren dhe të merren në pyetje të gjithë inspektorët që kanë akses në të”, tha Rama.
Sipas tij, shfrytëzimi kriminal i sistemit është shumë e lartë dhe këtu kemi të bëjmë me faktorin njerëzor.
