I vodhi me dhunë çantën e dorës 37-vjeçares, identifikohet dhe vihet në pranga autori i dyshuar i ngjarjes. Ngjarja ka ndodhur në qytetin e Korçës mbrëmjen e djeshme.
Policia njoftoi se “pas marrjes së njoftimit se në lagjen nr. 8, një shtetas i kishte vjedhur me dhunë çantën personale shtetases M.M., brenda së cilës ndodheshin 35000 lekë dhe dy karta krediti, shkuan në adresën e raportuar dhe bënë të mundur identifikimin, kapjen dhe shoqërimin në ambientet e policisë, të autorit të dyshuar të ngjarjes”.
“Në vijim të veprimeve specialistët për Hetimin e Krimeve në Komisariatin e Policisë Korçë, bënë arrestimin në flagrancë për veprën penale ‘Vjedhja me dhunë’ të shtetasit A. N., 37 vjeç, banues në Korçë (i dënuar më parë për vjedhje)”, shtuan të njëjtat burime.
Në cilësinë e provës materiale, iu gjetën dhe sekuestruan sasia e lekëve dhe kartat e kreditit.
