Në orën 16:00 pritet të nisë protesta e paralajmëruar nga ish-Kryeministri Sali Berisha kundër aferës së inceneratorëve dhe “Open Balkan”.
Ndërkohë duket se kjo protestë ka frikësuar Qeverinë, e cila ka marrë masat rreth godinës qeveritare. Kjo e fundit është rrethuar me kangjella hekuri, ndërsa janë angazhuar disa qindra forca policore.
Godina e Kryeministrisë do të ruhet nga Garda, ndërsa krahas rrethimit me hekura, do të ketë edhe një rrethim me trupa policore të Komisariateve të Tiranës. Ndërkohë që trupa të FNSH dhe RENEA do të jenë të vendosura nga pas godinës.
Sipas njoftimit të shpërndarë nga ish-Kryeministri Berisha, objekti i protestës do të jetë takimi që do zhvillohet në këto dy ditë në Shqipëri mes Kryeministrit Rama, Presidentit serb, Aleksandër Vuçiç, dhe Kryeministrit të Maqedonisë së Veriut, Zoran Zaev, në kuadër të projektit “Ballkani i Hapur”.
