“Shkarkimi i Bashës është përgjigjja më e mirë e demokratëve për këtë model”, tha sot Andrea Mano, kryetari i PD në Korçë, i cili e cilësoi Bashën si një njeri mashtrues, që ka humbur 4 herë nuk njeh kufij.
Duke ndjekur ecurinë e referendumit, Mano tha se “nga informacionet që kam pasur, ka dyndje votuesish; deri më tani mbi 600 persona. Një shifër e lartë kjo për degën e Korçës dhe sigurisht votimi do të vazhdojë deri në fund.”
“Është ditë e rëndësishme për PD-në, për demokratët, – theksoi ai, – se nuk është thjesht çështja e votimit të referendumit, por jemi kundër një kryetari që tashmë është i shkarkuar. Është votimi kundër një modeli më të keq që ka dhënë Basha, i një njeriu mashtrues, që për interesat e veta personale ka mashtruar demokratët, i një njeriu që ka humbur 4 herë dhe i ka çuar demokratët 12 vite në humbje, model i njerëzve që nuk njohin kufij. Shkarkimi i Bashës është përgjigjja më e mirë e demokratëve për këtë model.
Nëse doni mendimin tim, PD-ja duhet të ketë kryetarin që duhet të votojë anëtarësia me votim të hapur për të fituar detyrën e tij, edhe këtë e vendos anëtarësia. Nëse ajo e vendos me votë të lirë, çdo gjë është legjitime”, përfundoi Andrea Mano.
