Salla e Pallatit të Kongreseve në Tiranë yzrtarisht ka 2100 vende. Kjo thuhet nga Bashkia e Tiranës, kjo konfirmohet nga çdo e dhënë zyrtare lidhur me godinën e ngritur si simbol i ideologjisë komuniste.
Por sot u mësua se kjo sallë mban jo pak por mbi 5 mijë vende. Të paktën shifra u pohua nga Jemin Gjana, sipas të cilit në Kuvendin e thirrur nga Lulzim Bsha, ishin prezent 5004 delegatë, pa përfshirë këtu edhe ata që mund të ishin thjesht si mbështetës.
Dhe sikur për Bashën të kishin ardhur edhe nja 1 mijë anëtarë, atëherë në sallë do të ishin rreth 6 mijë persona, ose 3 fishin i kapacitetit të saj. Dhe përtej këtyre, po të shtohen edhe mbi 4900 delegatët që ishin prezent në Kuvendin Kombëtar të 11 dhjetorit, i bie që PD ka rreth 10 mijë delegatë Kuvendi, shumë më shumë edhe se Partia Komuniste e Kinës.
Ndoshta sot në sallën e Pallatit të Kongreseve mund të ketë pasur 5004 delegatë, ndoshta para 1 jave ka pasur edhe 4900 të tjerë në “Air Albania”, dhe nesër mund të dalë dikush tjetër që të thotë kam mbledhur 7 apo 8 mijë delegatë, por e gjithë kjo situatë kjo krijon një PD qesharake, e cila mund të gëzojë një apo dy emra, por në fakt nuk i shërben aspak atyre demokratëve, që në 30 vite i janë përgjigjur jo vetëm liderit apo kryetarit, por edhe çdo deputeti apo kandidati, sa herë që ka rënë kushtrimi.
