Ish-Kryeministri Sali Berisha ka konfirmuar sot se protesta që do të zhvillohet të hënën në Tiranë do të mbahet në orën 16:00, para godinë së Kryeministrisë. Protesta u paralajmërua më parë nga Berisha, i cili e lidhi me vizitën e Aleksandar Vuçiç në Tiranë, në kuadër të Open Balkan, që e konsideroi një nismë anti-shqiptare.
Gjithashtu Berisha tha se kjo protestë do të mbahet edhe kundër aferës së inceneratorëve. Ish-Kryeministri u shpreh sot se demokratët do të mblidhen fillimisht në oborrin e selisë së PD, më pas do të marshojnë drejt Kryeministrisë.
“Lulzim Basha pësoi metamorfozën e bravës dhe do të mbahet mend si Lulzim brava. Demokratët do të mblidhen në oborrin e PD ditën e hënë në orën 16:00, do të mblidhen në shtëpinë e tyre, pasi selia e PD nuk është pronë private e Lulzim bravës. Të hënë nisim protestat kundër vjedhjes së shqiptarëve dhe kundër projektit anti-shqiptar të Open Balkan”, tha Berisha, i cili më parë votoi në degën nr 2 të PD në Tiranë, në referendumin e anëtarësisë, për shkarkimin e Lulzim Bashës nga posti i kreut të partisë.
Berisha tha se revolucionin që ka nisur nuk e ndal dot askush, edhe sikur Edi Rama të dalë lakuriq, më keq se atëherë kur u shfaq në plazhe.
Ish-Kryeministri tha se ky proces nuk mund të cilësohet si anti-amerikan, pasi ai i përket njerëzve të lirë, duke promovuar vlerat më të mira të vendeve të lira.
