Prej orës 08:00 ka nisur votimi i anëtarësisë së PD-së për të ratifikuar vendimin e Kuvendit Kombëtar të 11 dhjetorit për shkarkimin e Lulzim Bashës nga posti i kreut të kësaj partie.
Fotot e mëposhtme tregojnë momentet e votimit nga qendra të ndryshme të ngritura në të gjitha degët e PD, ku në disa raste ato janë vendosur në ambiente private apo jashtë selisë së partisë, për shkak se nga Lulzim Basha janë urdhëruar drejtuesit apo strukturat e degëve që të mbyllin zyrat si një përpjekje për të mos lejuar procesin e votimit.
Nga raportimet mësohet se ka një fluks të demokratëve drejt pikave të përcaktuara më parë si qendra votimi, madje për të votuar kanë ardhur edhe anëtarë të PD-së, që jetojnë jashtë vendit. Fotot e mëposhtme tregojnë disa nga momentet e votimit, ku nuk mungojnë as rradhët e gjata, të demokratëve që presin të votojnë.
“Me referendumin e sotëm, që ne e futëm në statutin që miratuam më 11 Dhjetor, demokratëve i është dhënë fuqia për ratifikimin e vendimeve të organeve më të larta siç është Kuvendi. Me këtë referendum sot ratifikohet vendimi për shkarkimin e Lulzim Bashës nga kreu i PD për të gjitha veprimet me të cilat ai i ka çuar në humbje, i ka dëmtuar interesat politike të PD dhe mbi të gjitha nëpërmjet shkeljeve statuore të vazhdueshme të rënda, ka centralizuar pa kthim përtej çdo lloj caku, që më pas kanë shkaktuar një situatë dhe krizë të rëndë demokracie të brendshme.
Sot demokratëve u kthehet pushteti dhe në këtë proces ku po marrin pjesë në mënyrë masive do të kthejnë PD-në në startin për t’u bërë gati për t’u përballur me Edi Ramën. Beteja jonë është me Edi Ramën, vetëm Lulzim Basha na është kthyer në një pengesë të madhe me misionin e tij për të qëndruar në krye të PD me çdo kusht pavarësisht se humbet”, tha Oerd Bylykbashi, i cili voton në Durrës.
“Sot është një ditë shumë e bukur. Rrallë keni parë këtë lloj masiviteti dhe interesi nga anëtarësia e PD për të marrë pjesë në një proces të brendshëm, është referendumi i parë në 31 vite. Ka pasur masivitet në të 106 qendrat e votimit. Sot mbahet një referendum për shkarkimin e ish-kryetarit të partisë. Jam i bindur që do të shihni një proces model, dhe jam i bindur se histori si ato që kemi parë në Berat, të atij zotërisë që kishte ardhur nga Athina dhe merrte pjesë për herë të parë, na mbushin me shpresë se PD do të ringrihet më e fuqishme se kurrë. Beteja jonë është vetëm me Edi Ramën. Pas kësaj dite, ne menjëherë do të përveshim mëngët dhe të nisim betejën frontale me keqqeverisjen e Edi Ramës”, tha Belind Këlliçi, i cili votoi në degën nr 2 të PD në Tiranë.
