Ish-ministri i Mjedisit Lefter Koka është prangosur mëngjesin e së Martës pas një kërkesë të Prokurorisë së Posaçme të miratuar edhe nga gjykata. Ai akuzohet për vepra penale të shpërdorimit të detyrës, korrupsionit dhe pastrimit të parave.
Lefter Maliqi i ftuar në studion e Ora News, me gazetarin Arnold Kariqi u shpreh se kryeministri Rama e shiti.
“Patëm arrestim të bujshëm të Lefter Kokës, e përdori Rama për interesat e veta dhe e shiti siç shiti Tahirin. Kështu do shesë edhe të tjerët Rama, prisni! Siç shiti kryetarin e Lushnjes e me radhë. Të gjithë e dimë që kupola e krimit është ai që vendosi brenda ditës 14 urdhra që s’ka qenë fare në zyrë. Ka qenë Sekretari i përgjithshëm atje që ka marrë pjesë dhe ja çojnë këtij si kryeministër. Ashtu siç ikën dhe ata dy Mërtiri dhe ai tjetri që janë kryesorët, apo dhe ky hetim i pjesshëm që është bërë vetëm për Elbasanin, për Fierin dhe Tiranën që janë miliona euro shpërdorime nuk është bërë. U la Lefter Koka të mbajë një peshë, por jam i bindur që dhe ky shumë pak do qëndrojë në burg sepse pas këtij fshihet drejtpërdrejt Rama”, tha ish-deputeti Maliqi.
Gjykata e Posaçme e ka lënë në burg ish-ministrin e Mjedisit, Lefter Koka. Vendimi u mor sot, më 16 dhjetor. Seanca për verifikimin e masës së sigurisë u mbajt me dyer të mbyllura. Koka ishte vetë i pranishëm në seancë bashkë me avokatin Fatmir Braka. Gjyqtari i çështjes ishte Erion Bani, i cili kishte vendosur dhe masën paraprake. Vetë Lefter Koka ka mohuar akuzat në gjykatë duke deklaruar se ka respektuar ligjin.
