Kreu i Bashkimit Demokratik për Integrim (BDI), Ali Ahmeti u takua me kreun e LSDM-së, Zoran Zaev, takimi i parë ky në nivel udhëheqësish, pas zgjedhjeve të parakohshme parlamentare të mbajtura më 11 dhjetor 2016 në Maqedoni.
BDI në një deklaratë tha se në takim në parim u diskutua për qëndrimet respektive që palët kanë prezantuar në këtë periudhë, pa hyrë në detaje ose biseda për çështje të veçanta konkrete.
Nga ana tjetër Lidhja Social Demokrate, ndërkohë, nuk ka komentuar kushtet e vendosura nga partia e Ahmetit për krijimin e një qeverie.
Dje kreu i BDI-së u takua edhe me udhëheqësin e VMRO-DPMNE-së, Nikola Gruevski, duke pasur në plan të parë negociatat për një bashkëqeverisje të mundshme. Por për rezultate konkrete duket se do të duhen takime të tjera.
Kërkesat thelbësore të BDI-së janë zbatimi i dygjuhësisë në të gjithë territorin, zgjatja e mandatit të Speciales dhe vazhdimi i procesit të eurointegrimit.
