Lulzim Basha, i shkarkuar nga Kuvendi i 11 dhjetorit nga posti i Kryetarit të PD, u shpreh në një konferencë për mediat se përmes skemës mafioze të inceneratorëve u vodhën paratë e buxhetit të shtetit dhe shqiptarëve dhe me këto para u mbyllën edhe gojët për të mos denoncuar aferat kriminale.
Basha tha se PD iu drejtua me thirrje dhe me hapa ligjor SPAK-ut lidhur me këtë aferë mafioze.
“Njëlloj siç është e rëndësishme vettingu i politikanëve, ashtu është i rëndësishëm lufta ndaj korrupsionit dhe krimit. Shqiptarët nuk janë të varfër por të vjedhur. Kur SHBA shpallin se korrupsioni cënon interesat e tyre, por ne këtu çfarë duhet të bëjmë, kur një grup njerëzish kanë grabitur gjithçka”, tha Basha.
Sipas tij, këtu ministrat po pastrojnë para dhe po grabisin pronat publike, ndaj dhe duhet të miratohet sa më prë vettingu i politikanëve.
“Pa luftuar korrupsionin, nuk mund të ndryshojë asgjë. Ndaj PD mbështet pa kushte drejtësinë në luftën ndaj korrupsionit, përshëndes edhe ata hetues dhe prokurorë që po hetojnë zyrtarët e lartë”, tha Basha, duke shtuar se Qeveria e Edi Ramës është më e korruptuara në Europë.
Ai tha se ka presione ndaj drejtësisë për aferat e zyrtarëve dhe politikanëve, ndërsa shtoi se hetimet duhet të thellohen, dhe të mos mjaftohen me koka turku.
“Natyrisht Lefter Koka nuk është kokë turku, pasi ai nuk mund të nxirrte vetë 17 vendime, apo të mblidhte Grupin Parlamentar të PD. Gjithashtu edhe qeverisja e PD kishte korrupsion, ndaj edhe ne do të mbështesim çdo hetim”, tha Basha.
“E di që shpesh kjo retorikë mund të duket bajate, sespe edhe ish-qeverisja e PD ka patur pjesën e saj në këtë plagë të madhe për gjithë shoqërinë!!! Por ne jemi të vendosur të ecim përpara, të shkëputemi nga e kaluara jonë e keqe, dhe te zgjedhim të ardhmen që vetëm ne mund ta sjellim për shqiptarët!”, shtoi ai.
