Ish-Kryeministri Sali Berisha paralajmëroi nga Devolli, kreun demokrat Lulzim Basha, se do të përballet me drejtësinë lidhur me dosjen Nick Muzin.
“Harroje se do të shpëtosh, harroje se nuk do të përballesh me drejtësinë, je i pashpresë Lulzim. Do të përballesh me drejtësinë lidhur me dosjen Nick Muzin se ke shkelur ligjin amerikan dhe atë shqiptar. Do të përballesh ti dhe çdo kush që ka manipuluar këtë dosje”, tha Berisha nga Foltorja e Devollit.
Berisha i konsideroi si marrëzi dhe absurditet akuzat se Foltorja po bëhej për interesa të tij personale.
“Çështjen “non grata” unë do e zgjidh në Gjykatën e Parisit. Foltorja është për pluralizmin dhe rithemelimin e PD. Unë po mendohesha se si të ndërmerrja këtë lëvizje, por Lulzim Basha më ndihmoi me vendimin anti-statutor duke më përjashtuar nga Grupi Parlamentar. Lulzim Basha ishte pjesë e skenarit, u përdor në çdo aspekt, shkelmoi sovranitetin e partisë sonë dhe një parti jo sovrane, nuk mund të ekzistojë”, tha Berisha.
