Pedagogu i Akademisë së Sigurisë, Qetsor Gurra, u vu në pranga pasi akuzohet për korrupsion. Sipas hetimeve, Gurra ka favorizuar një efektiv policie për të marrë gradën “Nënkomisar” në këmbim të shumës prej 4.000 euro.
Në njoftimin e Prokurorisë së Posaçme kundër Krimit të Organizuar dhe Korrupsionit në Tiranë bëhet e ditur se “shtetasi me iniciale D.L. ka ofruar/premtuar një vlerë monetare në shumën 4.000 euro për provimin në Akademinë e Sigurisë Tiranë, si dhe ka përdorur dokumente të falsifikuara në procesin e provimit”.
Ndërkohë, Qetsor Gurra dyshohet se “ka kërkuar/pranuar përfitim të parregullt për të ushtruar ndikim të paligjshëm te punonjës shtetërorë për të favorizuar shtetasin D. L. në lidhje me provimin, për fitimin e gradës ‘Nënkomisar’, të zhvilluar në datën 27.10.2021 në ambientet e Akademisë së Sigurisë”.
Si D.L., (me detyrë trupë shërbimi në Njësinë e Autostradave në Drejtorinë e Qarkullimit Rrugor kandidat në procesin e konkurimit për gradën “Nënkomisar”) ashtu dhe Gurra u arresuan këtë të Enjte pasi Gjykata e Posaçme caktoi ndaj tyre masën e sigurisë së arrestit me burg, me kërkesë të SPAK.
Shërbimi për Çështjet e Brendshme dhe Ankesat njoftoi se subjektet e këtij procedimi penal, në procesin e konkurimit kanë depozituar dhe përdorur dokumente të fallsifikuara me qëllim përfitimin e padrejtë të pikëve në kualifikimin përfundimtar të konkurentëve.
Në funksion të hetimeve të kryera dhe të ekzekutimit të vendimeve penale të GJPKKO, u kryen kontrolle banesash, zyrash nga të cilat u sekuestruan prova materiale që dokumentojnë veprimtarinë e kundraligjshme te subjekteve, shtuan të njëjtat burime.
