Lideri i opozitës, Lulzim Basha ka nisur një takim me krerët e partive në rrethe dhe deputetët e opozitës, ku po diskutohet për zgjedhjet e ardhshme dhe përgatitja sa më e mirë e tyre.
Gjatë fjalës së tij, kryedemokrati Lulzim Basha tha se votimi elektronik është kushti për zgjedhjet e ardhshme, pasi është e vetmja mënyrë që eliminon manipulimin.
“Nëse Rama nuk e do votimin elektronik, të propozojë një mënyrë tjetër për zgjedhje të lira e të paminipulueshme”, u shpreh Basha në fjalën e tij.
Më poshtë pjesë nga fjala e kreut të PD-së, Lulzim Basha:
Koalicioni opozita ka vendosur paketën e kushteve për zgjedhje të lira dhe të ndershme ku përveç zbatimit të ligjit të dekriminalizimit mospërdorimin e aseteve shtetërore, kushti më thelbësor votimi dhe numërimi elektronik.
Që nga moment i marrjes së këtij vendimi nga opozita e bashkuar kam marrë me qindra mesazhe nga mbështetës, përfaqësues të shoqërisë civile, sipërmarrjes, botës akademikë dhe njerëz publikisht të afishuar si përkrahës të së majtës dhe që e konsiderojnë atë si kushtin për zgjedhje të lira dhe të ndershme.
Është e pakuptueshme që në 25 vite kontestimi i zgjedhjeve ka shoqëruar çdo votim dhe votimi elektronik është fundi I manipulimit të votës se me atë çdo shqiptar e ka të garantuar votën e tij. Nuk ia mohon askush atë mbledhje apo blerje kartash identiteti, as votimin drejtpërdrejt, as votimin e shumëfishtë.
Votimi elektronik thotë se gjithkush mund të votojë dhe askush më shumë se asnjëherë. Nuk ka votim të tjetrit.
Merr fund armata e kriminelëve që fut duart në kuti dhe tjetërson vullnetin e shqiptarëve, merr fund manipulimi i qytetarëve. E shikoni se vendimi i djeshëm nuk ka të bëjë me një kush të opozitës po me interesin e qytetarëve. A ka qytetarë sot që nuk e duan votimin e lirë, mos tjetërsimin e saj, që nuk dëshiron t’i japim fund maskaradës së manipulimeve të vlera, të terrorizuara të pushtetit?! Kjo nuk është një aspiratë vetëm e demokratëve. Ky nuk është objektiv vetëm i opozitës, por dëshirë e çdo shqiptari dhe me votimin elektronik shqiptarët do të kenë zgjedhje të lira dhe të ndershme.
Në 2015, raporti i OSBE-ODIHR e tha fare qartë se liria e votës është e kërcënuar nga pushteti i veshur me krim.
Disa përpjeke të mjerueshme të mazhorancës dhe të tellallëve të tyre po përpiqen të na japin kohë si justifikim. S’ka kohë për të garantuar lirinë e votës dhe zgjedhje të lira dhe të ndershme?! E gjejmë kohën. Ajo që nuk ka kohë është një tjetër palë tjetër zgjedhje të vjedhura ku qytetarët shesin dhe blejnë votën.
Koha për zgjedhje të lira dhe të ndershme nuk mbaron kurrë. Le ti lëmë broçkullat. Shqiptarët meritojnë zgjedhje të lira dhe të ndershme. Kjo mazhorancë nuk mund të fshihet pas një gjetheje fiku por t’u thotë shqiptarëve pse nuk e pranon sot votimin dhe numërimin elektronik dhe nëse nuk e pranon, çfarë alternative tjetër afron për të garantuar zgjedhje më të mira? Nuk besojmë por le ti afrojnë dhe të shqyrtojmë.
Kjo qeveri që e kapi zgjedhjet i trajton njerëzit si dele. I vodhi dhe i talli dhe nuk ka respekt për njerëzit. Në një vend ku qytetarët zgjedhin qeverinë, qeveria nuk mund kurrë të poshtërojë dhe dhunojë qytetarët po e ka detyrë ti respektojë se pushteti buron nga ata.
Zgjedhje të lira dhe të ndershme ne do ti japim formë nëpërmjet një kontakti intensive me qytetarët, dalje në terren, mobilizim për zgjedhje të lira dhe të ndershme.
Vendimi tjetër është hapja e një procesi për mbledhjen e propozimeve për kandidatët e ardhshëm të PD-së.
Qeveria dhe mediat e saj është sulur me klishetë se PD-ja nuk merr pjesë në zgjedhje. PD do të marrë pjesë në zgjedhje dhe ne do të fitojmë në zgjedhje të lira dhe të ndershme. Ndaj asnjë minutë kohë nuk do të harxhohet për përgatitjen e procesit të ardhshëm zgjedhor.
