Verilindja e vendit është përfshirë nga temperaturat e ulëta dhe reshjet e dëborës që prej natës së kaluar. Në Peshkopi bora raportohet se ka shtruar deri në 15 cm lartësi. I gjithë qarku i Dibrës është përfshirë nga reshjet e dëborës.
Në zonat e thella ka arritur deri në 20 cm. Raportohet për mungesë të energjisë elektrike në disa fshatra, pasi janë këputur telat dhe janë shembur shtyllat. Ka një situatë problematike në Lurë, e cila për momentin është izoluar. Po kështu, qarkullimi është bllokuar në Trebisht dhe disa fshatra të njësisë së Ostrenit.
Dëbora ka përfshirë edhe juglindjen e vendit. Reshjet janë regjistruar edhe në qytetin e Korçës.
Ndërkohë reshje dëbore me intensitet të lartë janë regjistruar edhe në akset Bilisht-Kapshticë, Qafëthanë, në fshatrat turistike të Dardhës, Voskopojës dhe në zonat e thella malore.
