Një video qarkullon në rrjetet sociale lidhur me një vizitë të kreut demokrat Lulzim Basha në Durrës.
Z. Basha ishte në qytetin bregdetar me datën 26 nëntor, ditë që mbushej plot dy vjet nga tërmeti tragjik, që shkaktoi 51 viktima, ndërsa Qarku i Durrësit, ishte më i prekuri, qoftë përsa i takon numrit të jetëve njerëzore të humbura, ashtu edhe banesave të dëmtuara ose shkatërruara.
Nga pamjet e mëposhtme, Basha shfaqet në një nga zonat në qendër të Durrësit, më konkretisht pranë Muzeut, ku i pranishëm është edhe kreu i degës, deputeti Ferdinand Xhaferri. Dhe bashkë me të janë jo më shumë se 10 persona, që sipas raportimeve janë pjesë e strukturës së PD-së.
Bazuar në informacionet e dhëna, vizita e Bashës mund të kishte lidhje me një takim me bazën e demokratëve në qytetin bregdetar, por që duket se ka dështuar për shkak të mungesës së pjesëmarrjes.
Ndërkohë një tjetër variant është ai i një takimi me familje, banesat e të cilëve janë dëmtuar nga tërmeti dhe janë lënë pa mbështetjen e strukturave të Qeverisë. Gjithsesi nga pamjet e mëposhtme, por edhe nga njoftimi zyrtar, duket se Basha nuk ka pasur ndonjë takim masiv, qoftë me strukturat, anëtarët apo familjet e prekura nga tërmeti.
Në një njoftim zyrtar nga PD, i datës 26 nëntor, thuhej se Basha vizitoi familjen Shkalla, ku thuhet “përvjetorin e dytë të tragjedisë së shkaktuar nga tërmeti i 26 nëntorit 2019, kryetari i PD, Lulzim Basha ishte në Durrës ku pasi vizitoi familjen Kujtim e Nexhmije Shkalla, që jeton ende në banesën e rrënuar, përcolli një mesazh për të gjithë ata që humbën familjarët e të dashurit e tyre, por edhe për të gjithë shqiptarët”.
“Kështu që sot jam këtu pranë jush, jo vetëm për të ju parë dhe për të ju shpreh mbështetjen time personale por dhe për tu zotuar para jush, para të gjithë banorëve të Durrësit të prekur nga tërmeti, para të gjithë banorëve shqiptarë të prekur nga tërmeti se ashtu siç ju kemi qëndruar pranë a ditë dhe natë ato orë dhe ditë të tmerrshme kur ndërkohë kërkonim akoma me shpresë nën rrënoja për të mbijetuarit. Ashtu siç kemi vazhduar të qëndrojmë pranë jush dhe pranë halleve tuaja pa ndarë dhe pa asnjë kalkulim politik apo paraelektoral, ashtu do vazhdojmë të qëndrojmë pranë jush derisa çdo problem i shkaktuar jo thjeshtë nga tërmeti por i rënduar nga keqeverisja dhe neglizhenca e tyre të marrë rrugë”, citohet Basha në njoftimin zyrtar.
