Aleatët e Partisë Demokratike kanë takuar kryeopozitarin Lulzim Basha paraditën e sotme në selinë blu. Pas takimit që zgjati rreth 1 orë, opozita tha se ka firmosur memorandumin për zgjedhje të lira. Sipas opozitës votimi dhe numërimi elektronik në zgjedhjet e ardhshme parlamentare është kërkesë e patejkalueshme.
Memorandumi është firmosur edhe nga kreu i PBDNJ, Vangjel Dule, i cili ishte pjesëmarrës në mbledhje.
Sakaq pritet që PD të vendosë marrëdhënie të kushtëzuara me Kuvendin. Në kohën kur ajo kërkon që shumica të pranojë votimin dhe numërimin elektronik, por mazhoranca e refuzon me pretendimin se për këtë kërkohet mendimi i OSBE-ODHIR.
Më herët PD ka deklaruar se pa votim elektronik që garanton zgjedhje të lira dhe të ndershme nuk mund të ketë zgjedhje në qershor.
Mësohet se demokratët do të qëndrojnë pak të hënën në nisjen e sesionit parlamentar. Derisa kreu i grupit Edi Paloka të zyrtarizojë qëndrimin e opozitës. Qëndrim i kushtëzuar që pritet të konfirmohet në mbledhjen e grupit parlamentar dhe më pas të kryesisë së Partisë Demokratike.
