Në fund të ndeshjes kundër Espanyolit, e cila shënoi debutimin e tij në stolin e Barcelonës, trajneri i ri Xavi Hernández, ka analizuar ecurinë e skuadrës dhe situatën e renditjes së “blaugranës”.
“Ne kemi vuajtur, është e qartë, – raporton ‘Marca’. – Ata janë një ekip i madh, i organizuar dhe që luajnë mirë. Është e vështirë të finalizohen të gjitha shanset. Është ende herët, kemi punuar për disa gjëra deri më tani.
Jam i lumtur me qëndrim dhe i kënaqur me rezultatin, por kemi vuajtur shumë. Sot nuk ka fitore të lehta, por duhet të përmirësohemi. Besimi i njerëzve na ka ndihmuar. Jam i lumtur për vlerat që ka treguar skuadra. Ne do t’i bëjmë ata të luajnë më mirë. Kemi ende shumë gjëra për të kuptuar, por tre prej tyre janë pika shumë të rëndësishme.”
Për vuajtjet në fundin e ndeshjes? “Espanyol shtyp dhe ka shumë armë. Ne duhet të vlerësojmë përpjekjet dhe të analizojmë lojën. Kemi vuajtur dhe nuk është e lehtë të mposhtim asnjë ekip.”
Për lojën e Barcelonës? “Ndonjëherë pashë një Barçë të mirë, por jo gjithmonë e kuptonim se kur duhet të sulmonim hapësirat në kohën e duhur. Nëse filloni të fitoni gjithçka bëhet më e lehtë. Më pëlqeu linja mbrojtëse, rendi taktik. Ne aktivizuam djem të rinj në fushë dhe mendoj se ata luajtën një lojë të shkëlqyer. Por ne duhet të përmirësohemi në fund të lojës, ta mbajmë topin dhe ta menaxhojmë atë me qetësi. Në 15 minutat e fundit kërkonin të luanim, por nuk ia dolëm”.
Për rënien e lojës në pjesën e dytë? “Nuk është një problem fizik, por një interpretim loje. Ne duhej ta mbanim topin dhe të kishim shumë personalitet. Është një problem loje, jo atletik.”
Rëndësia e fitores? “Është e qartë. Ne po ndërtojmë një projekt dhe marrja e tre pikëve na jep shumë entuziazëm. Mendoj se ishim mirë për 70 minuta, por duhet të përmirësohemi.”
Si është Aguero? “Kam folur me të një ditë më pare, por tani nuk di asgjë. Sidoqoftë, ajo që ka dalë në media nuk është e vërtetë.”
Tre të dëmtuar të tjerë? “Nico Gonzalez tendosi kyçin e këmbës, por nuk duket keq. Busquets ka një shqetësim muskulor dhe gjithashtu nuk duket keq. Mingueza doli me ngërçe”.
Do të luftoni për La Ligën? “Jemi larg, por ka ende shumë ndeshje. Pse jo? Kemi përvojë nga kampionatet e mëparshëm, ku skuadra ka rikuperuar shumë pikë. Vetëm me qëndrimin e duhur, lodhjen dhe sakrificën e duhur Barcelona mund të rikuperohet. Jam optimist, por kjo është fitorja ime e parë si trajner, skuadra e meritonte dhe kishte nevojë për të”.
Për Benfikën? “Jam më i qetë, por e marta do të jetë një luftë tjetër. Ne duhet të rikuperojmë lojtarët, sepse do të kemi një tjetër finale. Luajmë në shtëpi dhe nuk mund të humbasim disa vlera.”
Në 65% posedimi i topit? “Pragu ynë është mes 60 dhe 80. Kundërshtari i sotëm ishte i një niveli të lartë. Më shumë se posedimi, që është shumë i mirë, dua që ai të shërbejë për të qenë më i mirë dhe të krijojë më tepër shanse. Duhet të jemi më të guximshëm. Mund të rrezikojmë më shumë në sulm, por kjo është çështje besimi dhe kohe”.
