Kreu demokrat Lulzim Basha ka thirrur sot në një takim drejtuesit e degëve të PD-së në rrethe, vetëm dy ditë pasi me shumicën e votave të Kryesisë vendosi mbajtjen e Kuvendit Kombëtar të kësaj partie me 18 dhjetor.
Në kushtet kur nga ish-Kryeministri Sali Berisha është kërkuar thirrja e Kuvendit Kombëtar me 11 dhjetor, duke e mbështetur këtë në firmat e 4200 delegatëve, duket se Basha ka menduar lëvizjen e rradhës duke u takuar me 71 kryetarët e degëve të PD-së.
Burime nga kjo parti bëjnë me dije se kreu demokrat do t’i informojë drejtuesit e degëve lidhur me vendimet e marra nga Kryesia, sikundër do t’u bëjë të qartë se Kuvendi i vetëm Kombëtar i PD-së, do të jetë ai i 18 dhjetorit. Në këtë kuadër, kreu demokrat pritet t’u kërkojë drejtuesve të degëve që të informojnë strukturat, që përbëjnë edhe delegatët e Kuvendit Kombëtar, lidhur me mbajtjen e Kuvendit me 18 dhjetor.
Një pjesë e drejtuesve të degëve të PD kanë mbështetur hapur ish-Kryeministrin Berisha gjatë takimeve të Foltores, ndvrsa nuk dihet nëse ato do të jenë ose jo të pranishëm dhe nëse do të kundërshtojnë ose jo deklaratat e kreut demokrat.
Mbledhja e Kryesisë së PD prodhoi debate dhe replika mes mbështetësve të ish-Kryeministrit dhe kreut demokrat, apo mbështetësve të tij, të cilët Kuvendin e 11 dhjetorit e konsiderojnë një miting.
Ndërkohë që Kryesia e PD nuk ka pranuar as propozimin e kreut të Këshillit Kombëtar të PD, Edi Paloka, për verifikimin e firmave të delegatëve në zyrën e tij, nga 1 përfaqësues të secilit krah, dhe dy sekretarët, Ivi Kaso dhe Ervin Minarolli.
