Pesë të plagosur kanë mbetur nga një aksident i ndodhur te “Uji i Ftohtë” në Tepelenë, këtë të Shtunë.
Të aksidentuarit raportohet se ndodhen jashtë rrezikut për jetën. Ata janë një 20-vjeçar nga Tirana që drejtonte mjetin që doli nga rruga, pasagjerja po nga Tirana dhe tre refugjatë.
Sipas policisë, drejtuesi i mjetit nuk i është bindur urdhrit të efektivëve për të ndaluar dhe për shkak të shpejtësisë makina ka dalë nga rruga.
Drejtuesi i mjetit është arrestuar për veprat penale “Ndihma për kalim të paligjshëm të kufirit”, “Shkelja e rregullave të qarkullimit rrugor” dhe “Mosbindje ndaj urdhrit të punonjësit të policisë”.
Aksidenti
Policia njoftoi se: “A.K., 20 vjeç, banues në Tiranë, në aksin rrugor Kakavije-Gjirokastër, nuk i është bindur urdhrit për të ndaluar të shërbimeve të policisë, të cilët po ushtronin kontroll në automjete, me qëllim parandalimin dhe goditjen e veprimtarisë kriminale të dhënies ndihmë për kalim të paligjshëm të kufirit dhe si rezultat i shpejtësisë së mjetit, në vendin e quajtur ‘Uji i ftohtë’, Tepelenë, mjeti ka dalë nga rruga”.
“Për pasojë kanë mbetur të dëmtuar drejtuesi i mjetit, pasagjerja, shtetasia E.B., banuese në Tiranë dhe 3 emigrantë të paligjshëm, të cilët janë transportuar për në Spitalin Rajonal Gjirokastër, pa probleme për jetën”, shtuan të njëjtat burime.
Në cilësinë e provës materiale, u sekuestrua automjeti.
