Kreu demokrat Lulzim Basha akuzoi ish-Kryeministrin Sali Berisha se ka nisur një luftë brenda llojit në Partinë Demokratike, duke i shërbyer Edi Ramës.
Basha tha se Berisha ka hedhur akuza aspak të drejta, ndërsa u shpreh se i vinte keq pasi për vite me rradhë ka bashkëpunuar me ish-Kryeministrin.
“Kjo më ka bërë që të stepen në këtë luftë të brendshme të nisur brenda llojit”, tha Basha.
Kreu demokrat e konsideroi Foltoren e Berishës si një hakmarrje të tij ndaj Shteteve të Bashkuara, ndërsa u shpreh se askush nuk mund të marrë PD dhe ta kthejë në një bunker anti-amerikan për interesa të tij personale.
Basha tha se koha kur një grup personash kanë përfituar me lugë në brez nga Partia Demokratike ka përfunduar.
“Berisha po përdor një pjesë të PD si një mburojë ndaj Shteteve të Bashkuara. Do të marr çdo vendim që PD të mos kthehet në një bunker anti-amerikan”, tha Basha.
Sipas kreut demokrat, vendimi për përjashtimin e Berishës nga Grupi Parlamentar, Basha tha se vendimi merret nga lidershipi dhe jo nga anëtarësia.
“Nëse çështja do të shtrohej në forume, atëherë demokratët do ti vinim në një zgjedhje mes SHBA dhe liderit historik Sali Berisha dhe kjo nuk është zgjedhje”, tha Basha. Ai tha se vendimi është në përputhje me detyrimet statutore dhe me rregulloren e Grupit Parlamentar.
Pyetje: Ju para dy muajsh vendosët që ta pezullonit z.Berisha nga grupi parlamentar i PD pas kërkesës nga SHBA dhe vendimit të sekretarit Blinken për ta shpallur atë non grata. Me këtë fushatë dy mujore të z.Berisha kundër jush dhe paralajmërimeve të tij për të mbledhur Kuvendin e për të kandiduar për kreun e PD, a mendoni se është i mjaftueshëm akti juaj i pezullimit?
Basha: E kam shpjeguar qartë kontekstin e pezullimet të Berishës nga grupi parlamentar. Me atë që ka bërë këto dy muaj ka treguar qartë se atë që e ka nisur si lëvizje për gjoja demokraci, e ka sebep. Hakmarrje ndaj meje, mund ta them me gojën plotë. Ai se ka luftën me mua as për demokracinë e brendshme të PD, por me SHBA-të. Vendimi ka ardhur nga SHBA-të, të cilët e kanë përcaktuar si non-grata, të padëshirueshëm politikisht. PD nuk mund të jetë dhe nuk mund të funksionojë si mburojë për një person të shpallur non-grata, secildo qoftë ai. Askush s’mund të marrë dhe të kthejë PD si një bunker për interesat e veta. Ky është qëndrimi statutor i PD. Kjo ka qenë edhe kur Berisha ishte kryetar i PD. Nuk është detyrimi im si kryetar i zgjedhur me ‘një anëtar, një votë’. Ky është detyrim i çdo demokrati që mos të lejojë që PD të përdoret si mburojë për të cilit të fshihet kush është shpallur non-grata. Ai po përdor PD, ose një pjesë të saj si mburojë ndaj SHBA-ve. Unë dua t’jua them fare qartë se do të merret çdo vendim që është i nevojshëm që PD mos të kthehet në një bunker të interesave personale as të Berishës, as dikujt tjetër. Por do të vazhdojë të jetë alternativa e vetme e shqiptarëve ndaj këtij regjimi dhe pro SHBA-ve.
