Ish-Kryeministri Sali Berisha u shpreh sot se qeveritarët mendojnë vetëm për pasurimin e tyre, ndërsa studentët shqiptarë paguajnë pagesat më të larta krahasuar me bashkëmoshatarët e tyre kudo në Europë.
“Duke qenë të inkriminuar, me lidhjet e krimit, ata kanë frikë nga ju, ndaj edhe bërtisnin rroftë Covidi dhe mbyllën Universitetet, duke ju lënë rrugëve. Ata bënë gjithçka që tju mbajnë larg juve, por kjo është koha e juaj, mjerë ata”, tha Berisha.
Duke u ndalur në problemet e brendshme në PD, Berisha tha se peng-kryetari ka humbur çdo lloj morali drejtues, dhe së fundmi është vërsulur ndaj FRPD dhe LGD, në një hakmarrje të turpshme primitive.
“Basha po të ishte burrë duhej të vinte këtu, në një debat të hapur. Por ai rri i kyçur në zyrën e tij dhe me telefon urdhëron uzurpimin e FRPD dhe LGD”, tha Berisha.
Në vijim, ai u shpreh se këto organizata nuk janë prona të askujt, pasi kanë statutet e tyre dhe aderojnë në organizatat ndërkombëtare.
“Askush nuk është kundër proceseve zgjedhore, kundër statutit, por ato janë procese ekskluzive të FRPD dhe LGD. Do jeni ju që do të përcaktoni rregullat. Basha është një kryetar pa parti, e ka kapur një frikë dhe tmerr nga anëtarësia, është plotësisht i pashpresë. Ftojeni Bashën në një debat, të mos fshihet, të mësojë nga ju ABC e demokracisë se po sillet sikur është shkolluar në Korenë e Veriut dhe jo në Holandë”, tha Berisha.
