Autoritetet turke njoftuan se 30 persona do të ndiqen penalisht për postimin e mesazheve “të rreme dhe të pabaza” në lidhje me shëndetin e presidentit Recep Tayyip Erdogan.
“U konstatua se hashtag-u #dead u publikua në rrjetin social Twitter, me referenca për Presidentin tonë”, thuhet në njoftimin e Drejtorisë së Përgjithshme të Sigurisë.
“Nën hashtag-un e mësipërm janë identifikuar 30 persona dhe ndaj tyre kanë filluar procedurat e nevojshme”, vijon njoftimi.
Gjendjen shëndetësore e 67-vjeçarit Erdogan, i cili ka dy dekada në pushtet, shpeshherë ka qenë pjesë e diskutimeve.
Erdogan bëri daljen e tij të fundit publike të dielën në samitin e G20 në Romë. Presidenti i Turqisë anuloi pjesëmarrjen e tij në Konferencën Ndërkombëtare të OKB-së për Ndryshimet Klimatike (COP26) në Glasgow, për arsye sigurie.
