Ambasadorja e SHBA në Tiranë, Yuri Kim ka zhvilluar takime me drejtuesit e grupit parlamentar të PD dhe të PS, përkatësisht Alfred Rushaj dhe Taulant Balla.
Ky takim vjen përpara mbajtjes së mbledhjes së Këshillit të Legjislacionit, ku pritet të diskutohet lidhur me ndryshimet kushtetuese sa i përket zgjatjes së mandatit të Vettingut dhe reformën zgjedhore.
Megjithëse nuk ka një informacion zyrtar mbi temat e diskutuara mes diplomates amerikane dhe drejtuesve të Grupeve Parlamentare, mendohet se në qendër të tyre, ka qenë pikërisht nisma e propozuar nga PS për zgjatjen e afateve të Organeve të Vetting.
SHBA dhe më pas BE, përmes ambasadorëve respektivë në Tiranë, kanë mbështetur zgjatjen e afateve të organeve të Vetting, pavarësisht se Kushtetuta parashikon që rolin e KPK, nga momenti që i mbaron mandati, e luan KLGJ për gjyqtarët dhe KLP për prokurorët.
Në mbledhjen e zhvilluar lidhur me paketën e propozuar nga demokratët, PD kërkoi që të trajtoheshin edhe propozimet e saj për ndryshimet Kushtetuese, që kanë të bëjnë me vettingun në politikë, ndarjen e re territoriale, por edhe reformën zgjedhore.
Kërkesa e PD nuk u pranua nga mazhoranca e Kryeministrit Edi Rama, i cili gjithashtu ka kundërshtuar njv kushtëzim të votave të opozitës për miratimin e zgjatjes së afateve për Organet e Vetting me miratimin nga PS të ndryshimeve të propozuara nga PD lidhur me Kushtetutën.
