Nga Klodian Tomorri
Aeroporti i Prishtinës këto kohët e fundit ka qenë në shitje. Ose më saktë koncesionari, që e zotëron ishte i hapur ndaj mundësisë për ta shitur. Por nuk shkoi asnjëri nga këta që gjuajnë paratë e lehta e për ta blerë. Arsyeja është sepse tek Aeroporti i Prishtinës nuk ka fitime qyl. Kontrata koncesionare është hartuar dhe firmosur në mënyrë të tillë, që mbron interesin publik.
Ka zëra se tentuan ta ndryshojnë kontratën, por nuk u eci. Tentuan të zgjasin afatin e koncesionit, por Albin Kurti nuk pranoi ta zgjaste as për të kompesuar kohën e pandemisë, ku aeroporti thuajse ishte i mbyllur, jo me të jepte vite shtesë. Kjo është qeveria që nuk vjedh.
Tani krahasojeni pak këtë me atë që ndodh në Shqipëri. Një koncesioni që u shit para ca vitesh ja zgjatën afatin 10 vjet. Një tjetri më shumë se 10 vjet. Nje tjetër më lart, nuk ka paguar as faturat e ujësjellësit. Dhe çfarë kontratash janë këto tonat. Kontrata që të lënë të paktën nga 30-50 milione euro në vit, fitim të pastër. Madje një pjesë e madhe e tyre janë të garantuara nga buxheti, pra para e lehtë pa asnjë risk për privatin. Kjo është ajo qeveria tjetër.
E megjithatë Shqipëria i lejon vetes që të ketë dhe mendimtare, të cilët kritikojnë Albinin. Ai mund të ketë filozofi apo bindje të gabuara. Mund të jetë etatist i ekzagjeruar apo në spektrin ekstrem të së majtës. Por në një shoqëri demokratike, një kryeministër e ka bërë 80 për qind të punës së tij vetëm duke mos vjedhur.
Kështu që sikur të kishim një çerek Albini sa të shpëtojmë nga këto kontratat zhvatëse nuk do ishte keq.
