Disa dhjetra anëtarë dhe simpatizantë të PD e kanë pritur me ovacione dhe brohoritje ish-Kryeministrin Sali Berisha në takimin e rradhës në Lezhë, në kuadrin e turit që e pagëzoi me emrin “Foltorja”.
Nën thirrjet “Rama ik” dhe “Berisha, Berisha”, anëtarët e simpatizantët e PD, kanë mbushur sallën e Pallatit të Kulturës në Lezhë.
Ish-Kryeministri duke iu drejtuar të pranishmëve u tha se përulet me nderimin më të madh para historisë së këtij qyteti, i cili u bë kryeqyteti i parë i trojeve shqiptare.
“Ky qytet u bë djepi i besëlidhjes kombëtare të shqiptarëve, qyteti në të cilin prijësit e kombit shqiptar, shpallën Skënderbeun Zotin e shqiptarëve, prijësin e tyre të përjetshëm”, tha Berisha.
Berisha tha se ky qytet frymëzon çdo ditë virtytin më të arrirë për shqiptarët, besën e tyre për vendin dhe trojet e tyre.
Duke i falenderuar me mirënjohjen më të madhe për këtë Foltore të zjarrtë, sikundër e quajti ai, Berisha tha se “përmes saj ngrihen peshë shpresat e shqiptarëve”.
“Foltorja është shndërruar në një uragan shprese dhe optimizmi se ky vend do të shndërrohet me shpejtësi të madhe”, tha Berisha.
Sipas tij, për herë të parë pas 30 vitesh, Shqipëria ka një llavë të tillë entuziazmi, besimi dhe shprese, ashtu si 30 vjet më parë kur përmbysëm diktaturën, sot do të përmbysim narko-shtetin e Edi Ramës.
“Ndodhemi në gjendje kritike, pasi Edvin Rama dhe banda e tij e pushtetit e ka zhytur këtë vend. Tetë vite në pushtet, Edi Rama riktheu mashtrimet e mëdha të diktaturës komuniste”, tha Berisha. Ai u shpreh se Rama ndërtoi narko-shtetin e vetëm në Europë, duke qeverisur me bandat dhe krimin.
“Na ka kthyer njëlloj si Afganistani i talebanëve dhe vendet të tjera të diktaturave. I ka mjeruar shqiptarët në 8 vite”, u shpreh Berisha.
