Banorët e Arbanës kanë dalë sot në protestë, për shkak të mungesës së mjekut në fshatin e tyre. Ata thonë se mjeku i familjes shkon vetëm 1 ditë në javë dhe e ka të pamundur që tiu shërbejë të gjithëve, për shkak të fluksit të lartë.
Qytetarët shprehen se detyrohet të shkojnë në klinika private në mënyrë që të vizitohen, ndërkohë që shumë prej tyre kanë probleme kronike me shëndetin e tyre.
‘Ne nuk kemi nevojë për ambulancë, ne kemi nevojë për doktor, kjo nuk ka asnjë lidhje me politikën, ka të bëjë vetëm me hallet e njerëzve që jem i këtu, kemi pleq, kemi plaka. Shkojmë në privat ku të ketë doktor, këtu vetëm një ditë në javë vjen një doktor, këtu mblidhen 7 fshatra, të vish të martën këtu është një miting i vërtetë’, shprehet një qytetar.
“Unë jam i vjetër, dhe kjo qendër nuk ka mbetur njëherë pa doktor, duhen dhjetë mijë me shku dhjetë mij me ardh, se nuk pret taksia aty. Kjo zonë nuk ka kryepleq, se nuk janë për të zgjidhur hallet e popullit, popullit ia kanë vu vizën. Çfarë do të bëjë doktoresha njëherë në javë që vjen. Në spital nuk të sheh kush po nuk dhe pare, skanerin nuk ta bëjnë po nuk qite pare. Shëndetësi falas nuk ka, po nuk i dhe pare doktorit në urgjencë të lë të vdesësh aty. 400 mijë lekë kam lënë për dy ditë në spital te 5, unë 150 mijë lekë marr pension”, tregon një tjetër prej banorëve të Arbanës.
